Yeditepe Universitetinin Xəstəxanasının nümayəndə heyəti ATU-nun qonağı olub

  Bu gün Türkiyənin Yeditepe Universitetinin Xəstəxanasından gələn nümayəndə heyəti Azərbaycan Tibb Universitetində (ATU) qonaq olub. Qonaqlarla görüşdə ATU-nun rektoru, professor Gəray Gəraybəyli universitetin fəaliyyəti, tədris sahəsində islahatlar və qurumun artan beynəlxalq əlaqələri haqqında məlumat verib.

G.Gəraybəyli qeyd edib ki, ATU-nun Türkiyənin bir çox universitetləri ilə rəsmi əməkdaşlıq münasibətləri mövcuddur və bu əlaqələr daim genişləndirilir. Rektor Türkiyə ali məktəblərinin bir çoxunun professorları, müəllimləri ölkəmizdə master-klass, təlimlər keçdiyini bildirib. Bu yaxınlarda İstanbulda Türkiyə ilə Azərbaycan universitetlərinin rektorları arasında böyük görüş keçirilib.

Bakı-Tbilisi-Qars kimi çox önəmli bir layihənin işə düşdüyü vaxt, Bakıda keçirilən Yüksək Səviyyəli Strateji Əməkdaşlıq Şurasının iclasından sonra həm də ikinci tarixi hadisə baş verib. Azərbaycan və Türkiyə hökumətləri arasında təhsil sahəsində əməkdaşlığa dair saziş imzalandı. Qarşılıqlı əməkdaşlığın genişlənməsi üçün bir çox imkanlar yaradan bu sazişdə həmçinin ikili diplomların rəsmən qəbul olunması məsələsi də yer alıb ki, bu da təhsil sahəsində münasibətlərin daha da inkişafına təkan verəcək.

Rektor universitet daxilində fəaliyyət göstərən klinikalar haqqında da qonaqlara geniş məlumat verdi. Bildirib ki, hazırda ATU-nun 4 müasir klinikası fəaliyyət göstərir: Tədris Stomatoloji Klinika, Onkoloji Klinika, Tədris Terapevtik Klinika və Tədris Cərrahiyyə. Klinikaların hər biri zəngin maddi-texniki baza, müasir cihaz və avadanlıqla təchiz edilib. Özünü maliyyələşdirmə ilə fəaliyyət göstərən bu klinikalarda tələbə və rezidentlər həm nəzəri, həm də praktik bilgilərə yiyələnirlər.

ATU ilə Yeditepe Universitetinin tibb fakültəsi arasında əlaqələrdən danışılarkən bu münasibətlərin tədris-təlim istiqamətində inkişaf etdirildiyi vurğulanıb.

Hazırda ikitərəfli əməkdaşlıq protokolunun təfərrüatlarının hazırlanması üzərində iş aparılır.

Yeditepe Universitetinin Xəstəxanasının İdari direktöru Dr.Arzu Akkaş Bakıda olmaqdan məmnunluğunu ifadə edərək rəhbəlik etdiyi təşkilatın işi haqqında məlumat verib. Onun sözlərinə görə, Yeditepe Universiteti 1996-cı ildə yaradılıb. Türkiyənin ikinci özəl universiteti olan Yeditepede tədris ingilis dilində aparılır. 2005-ci ildə ilk klinikamızı açdıq. Bu, 100 çarpayılıq bir klinikadır. Sonradan tələbə və rezidentlərin, uzmanların ehtiyacını nəzərə alaraq, daha bir klinikanı yaratdılıb.

Görüşdə iki universitet arasında hazırlanan əməkdaşlıq memorandumunun detalları müzakirə olunub, sənədə universitet klinikalarının qarşılıqlı xəstə mübadiləsinə dair məsələlərin əlavə olunmasına dair ilkin razılıq əldə edilib.

6 Dekabr 2017
Bu mətn 73 dəfə oxunub